کۆنگرەی نیشتمانیی کوردستان، بە ڕێز و پێزانینەوە، پیرۆزبایی گەرم و برایانەی خۆی ئاراستەی شێخ حکمت الهجری، ڕێبەری ڕۆحی و نەتەوەییی درووز، و نەتەوەی سەربەرزی درووز دەکات، بە بۆنەی ڕاگەیاندنی جیابوونەوەی بەتەواوەتیی جەبەل بەشان لە حکومەتی دیمەشق.
ئەم هەنگاوە دەربڕینی ئیرادەی سیاسیی نەتەوەیەکە بۆ مافی چارەنووس، پاراستنی ناسنامە، کەرامەت و بەدەستهێنانی سەروەریی تەواو. کۆنگرەی نیشتمانیی کوردستان باوەڕی وایە کە سەربەخۆیی، سەروەری و ئازادی پایەکانی مانەوە، ئاسایش، بەردەوامیی مێژوویی و داهاتووی شکۆداری هەر نەتەوەیەکن.
لەو ڕوانگەیەوە، کۆنگرەی نیشتمانیی کوردستان ڕێز لە هەڵوێستی بوێرانە و بەپرەنسیپی شێخ حکمت الهجری دەگرێت، و پشتگیری لە مافی نەتەوەکان دەکات بۆ ئەوەی بە ئیرادەی خۆیان چارەنووسی خۆیان دیاری بکەن، دەسەڵاتی سیاسیی خۆیان بنیاد بنێن، و لەسەر خاکی خۆیان بە ئاشتی و کەرامەت بژین.
کۆنگرەی نیشتمانیی کوردستان داوا لە دەوڵەتان، نەتەوەکان و کۆمەڵگەی نێودەوڵەتی دەکات کە بە ڕێزەوە مامەڵە لەگەڵ ئیرادەی سیاسیی نەتەوەی درووز بکەن، مافی ڕەوای ئەم نەتەوەیە بۆ سەربەخۆیی و سەروەریی جەبەل بەشان پشتڕاست بکەنەوە، و هەنگاو بۆ دانپێدانان و پشتیوانیی سیاسی لەم قۆناغە مێژووییە بنێن.
هیواخوازین ئەم قۆناغە نوێیە لە مێژووی جەبەل بەشان ببێتە بناغەیەک بۆ ئاشتی، دادپەروەری، هاوکاریی نێوان نەتەوە ئازادیخوازەکان، و داهاتوویەکی سەربەخۆ و شکۆدار بۆ نەتەوەی درووز.
کۆنگرەی نیشتمانیی کوردستان
٢٢ی ئایاری ٢٠٢٦